LINKS



PENCARIAN DATA

ONLINE ADMIN

Ketua Umum

Sekretaris Umum

Bendahara Umum

Admin


A D M I N

MINGGU TANGGAL 20-26 JULI 2014

T E M A             : BUJUR IBAS NURIKEN KEBENAREN.

T U J U N         : Gelah Moria :

  • Ngidah ketetapen ukur Jusup ibas ukurna bujur nuriken kebenaren.
  • La mpebelin perbedan pengangkan si nguda ras metua.

 

SI MAN OGEN : Kejadin 37:5-11

METODE PA   : Drama ras Diskusi.

Kata Penaruh.

Nuriken kerna kebenaren labo sada dahin si melukah, pasti mbue kal ndatken tantangen. Emaka enterem kal nge jelma labo ngasup nuriken kerna kebenaren, amin gia itehna nge maka e payo ras benar. Eme sabapna maka lit kuan-kuan i bas kita : “Kata tengtenglah turiken, ula kata tuhu“ sabap adi kata tengteng, labo banci erbahan kalak ernembeh ate sabap i cocokken ras situasi paksa e, amin gia labo tuhu.  I bas kalak Karo si e me megati jadi masalah. Bicara lit sekalak diberu mejile rupana, ilebuh ia… ”o mejile“ ningen, banci saja labo ia senang. Apai ka adi sebalikna, banci turah persoalen si mesangat. Bagepe ibas nuriken sada-sada hal, umpamana si erkawiten ras biak sekalak jelma. Si eteh nge maka biakna e labo payo, tapi banci saja labo kita pang ngatakenca man bana. Padahal adi sikataken pe nuduhken ateta keleng nge nandangi ia. Gelah ula ndauhsa ia ndabuh ku bas dosa ibas biak ras perbahenenna si la payo.  Mari si inget kai nina Tuhan man kalak Israel erkelang-kelangken Esekiel, ibas Esekiel 33:8 “Adi kupebetehken man kalak jahat maka mate ia, tapi la ipersingetindu ia maka iperobahina lagu langkahna maka ia terkelin, jenari mate ia ibas dosana, kam arus ertanggungjabab kerna kematenna”. Alu bage arus si eteh maka  selaku kalak Kristen arus ngasup nuriken kebenaren, amin gia si ituriken kita e labo entabeh akap kalak ngalokenca.

 

Mpebagesi Pengangkan Kerna Ogen.

Anak Jakub lit 12 kalak. Salah sada anak Jakub ibas si 12 kalak e tergelar si Jusup. Si Jusup ibereken Tuhan sada kelebihen eme rusur ngaloken nipi, saja  megi ulih nipi enda senina-senina la meriah ukurna, dingen la ngasup ngalokensa. Bageme ibas sada berngi ernipi Jusup, ibas nipina e teridah maka kerina ia i juma sangana ngerakuti gandum, gandum senina-seninana mungkuk man gandum si enggo irakuti Jusup. Bagepe ernipi ka Jusup peduakaliken, ija idahna matawari, bulan  ras sepuluh sada bintang mungkuk man bana. Megi nipi enda erbahanca senina-seninana ras bapana jine pe rukur negatif nandangi kai si ikataken Jusup. Emaka nina bapana : “akapndu kin maka nandendu, senina-seninandu ras aku reh  mungkuk man bandu?” ( ayat 10).

Padahal kai si ituriken Jusup man senina-seninana ras bapana kerina kata si tuhu-tuhu, labo lit sitik pe itambah-tambahi ntah ikurang-kurangina.Tapi erkiteken ulih nipina enda erhubungen ras kegeluhen senina-seninana, si erpengakap ia irendahken ras Jusup ibas posisi si meganjang.

Arah enda teridah kiniganjangen ukur. Kiniganjangen ukur enda ka me dungna mpeturah ukur si la mehuli ibas senina-seninana.  Ibas ayat 11, “cian ate kerina senina-seninana man Jusup”. Kepeken perukuren si negatif nangdangi sada-sada hal si iakap la payo (amin gia kai si ikataken e payo nge), mpeturah perbahanen si la payo ka. Emaka lit nge sura-sura senina-seninana guna munuh Jusup, amin gia dungna idayakenna Jusup man kalak Mesir.

Situhuna si Jusup bujur kal nge ukurna ibas ia nuriken nipina man senina-seninana. Enda teridah maka seh dua kali iturikenna man seninana kerna nipina, padahal kenca iturikenna nipi si pemena pe lit nge perukuren si la payo ibas seninana nari. Teridah nge maka seninana labo senang. Tapi kenca ernipi si pedua kaliken pe, tetap denga nge iturikenna man seninana. Labo lit ukurna ntah pe iidahna si la mehuli ibas seninana, sabap si mehuli ngenca iukurina. Ijenda teridah maka Jusup “percaya diri” kal nuriken kebenaren e. Amin gia arus ngalaken erbage-bage resiko, labo itukang-tukangina, labo iturikenna kata “tengteng” man seninana, tapi tetap nge kata si tuhu-tuhu.

 

Pengkenaina.

Bage me megati i bas jabu, dikune anakta si kitik denga nuriken sada-sada hal si payo, entah ipersingetina kita ibas kelepakenta, banci saja selaku orangtua kitik si akap man banta, la teraloken kita kai siniturikenna e. La terjeng anak-anakta, antara perbulangen ras ndehara pe megati turah persoalen dikune ituriken kerna kebenaren, la teraloken pasangenta. Umpamana, sekalak ndehara ngataken man perbulangenna gelah ngadi ngisap erkiteken lit bahayana man kesehaten, banci saja labo iakap perbulangen tengteng, piah dungna turah perubaten. Entah sebalikna, perbulangen ngataken man ndeharana gelah ula royalsa makeken duit, mis iakap ndeharana la payo. Si erbahansa biak sibagenda jadi eme biak meganjang ukur mekelek denga kal bas kita, emaka la meriah ukurta adi ipersingeti kalak kerna kekurangenta. Apai ka adi kalak si mpersingeti kita e si akap teruken, ntah ngudan asangken kita, mesera kal si akap ngalokensa. Ibas budayanta kalak Karo pe megati lebih iergaken kalak si enggo erjabu asangken si langa erjabu, lebih ibegiken kalak si metua asangken si nguda denga. Jenari ibas kita kalak Karo pe nggo rurat nuriken kata tengteng labo kata si payo seh maka mesera kal si akap ngaloken adi lit kalak si nggit nuriken kerna kai si tuhu-tuhu i bas geluhta ntah pengerana, perbahanenta si la pas ipandang kalak kita labo teraloken kita sie kerina.

I tengah-tengah perpulungen pe megati turah sibagenda rupana. Rusur terbegi belas-belas nina “kami siap i kritik” adi la si akap payo, “katakenlah kekurangen kami” enda megati ikataken pertua ntah diaken, bagepe ibas pengurus-pengurus si lit ibas perpulungen. Tapi dikune seh paksana ialokenna kritiken ntah persinget ibas temanna nari, labo teralokenna, ulihna turah masalah, si nembehen, si kitiken ukur, lanai si perkuanen ras sidebanna. Selaku kalak Kristen, arusna ngasup kita ngaloken kata kebenaren sinibelasken temanta. Pangen nge kalak ngataken si benar amin gia la si akap entabeh ngalokenca, asangken si tengteng tapi situhuna labo benar. Memang adi si tengteng e, entabeh si akap megikenca, tapi banci saja maba kita ku kebenen. Emaka arus tetap si pebelin biak positif ibas nanggapi sada-sada masalah, labo pebue sikap negatif. Kerina e guna kiniulin dirinta jine bage pe kegeluhenta.

 

Drama ras Diskusi.

Pilih 2 kalak Moria guna mperagaken drama enda (Moria A ras Moria B ). Moria A mpersingeti Moria B, perban Moria B rusur make uis (paken) si la metunggung. Nggo nterem rusur kalak kusik-kusik, apai ka arah  perbapan, erkiteken paken si ipake Moria B seh kal ketatna, ku Gereja pe erleajing ka. Langa cocok ras situasi i bas inganta tading. Emaka cubaken praktekken uga nge cara Moria A nurikenca, jenari uga ka tanggapen Moria B guna ngalokenca.

  1. Dikune kita, lit kalak si mpesingeti kita alu kata si payo (benar) nangdangi kelepakenta, uga nge tanggapenta?
  2. Apai nge pangen ipersingeti kalak kekurangenta, asangken sinik saja kalak sideban amin gia lanai payo perdalinta? Turiken isi pusuhta!